ქუთაისში დიუშენით დაავადებული ბავშვების მხარდამჭერი აქცია გაიმართა.
აქციაზე ბავშვების მშობლებიც იმყოფებოდნენ.
მათი თქმით, დიუშენის კუნთოვანი დისტროფია არის ფატალური დაავადება, რომელიც იწვევს კუნთების გადაგვარებას და ადრეულ ასაკში ადამიანის სიკვდილს და სახელმწიფოს უმოქმედობის გამო საქართველოში ყოველწლიურად იღუპებიან დიუშენით დაავადებული ბავშვები.
დიუშენით დაავადებული ბავშვების მშობლები ორი წელია, ხელისუფლებას შვილებისთვის სასიცოცხლოდ მნიშვნელოვანი წამლების შემოტანას სთხოვენ. ამ მოთხოვნით ისინი აქციებს მართავენ. მიხეილ სარჯველაძე კი აცხადებს, რომ ეს მედიკამენტები სარისკო და საფრთხის შემცველია.
დიუშენის კუნთოვანი დისტროფია ერთ-ერთი ყველაზე გავრცელებული და მძიმე გენეტიკური კუნთოვანი დაავადებაა ბავშვებში. მსოფლიოში ყოველი 3000 ბიჭიდან 1 ამ სინდრომით იბადება. გოგოებში ეს დაავადება იშვიათია.
დღეს მსოფლიოში დიუშენის სინდრომით დაახლოებით 250 ათასიდან 300 ათას ადამიანამდე ცხოვრობს. საქართველოში ამ დიაგნოზით სულ 100-მდე ადამიანი, მათ შორის, უმეტესობა ბავშვია აღრიცხული. ამ დაავადების პირველი ნიშნები 2-5 წლის ასაკში ჩნდება. დროსთან ერთად დაავადებაც პროგრესირებს. უკვე 6-8 წლის ასაკში ბავშვს კიდევ უფრო მეტად უძნელდება სირბილი, ჩნდება კუნთების ძლიერი სისუსტე. 10 წლის ასაკიდან კი ბავშვების უმეტესობა სრულად კარგავს სიარულის უნარს. ისინი ეტლში აგრძელებენ ცხოვრებას. მალევე თავს იჩენს გულისა და ფილტვის დაზიანება და მოზარდებს სუნთქვის აპარატები სჭირდებათ.
დიუშენის კუნთოვანი დისტროფიით სიცოცხლის ხანგრძლივობა საშუალოდ 20 წლამდეა. თუმცა თანამედროვე მკურნალობის, ახალი მედიკამენტებისა და რეაბილიტაციის წყალობით, სიცოცხლის 10-20 წლით გახანგრძლივება შეიძლება.
