მართლმადიდებელი ეკლესია 17 დეკემბერს ბარბარობას აღნიშნავს. წმინდა დიდმოწამე ბარბარე III-IV საუკუნეებში ცხოვრობდა. მისი მამა დიოსკორე დიდგვაროვანი წარმართი იყო, რომელიც შვილს საგანგებოდ აშენებულ კოშკში, უცხო ხალხისგან მოშორებით ზრდიდა.
მიუხედავად ამისა, ბარბარემ ქრისტიანი თანატოლები გაიცნო და თვითონაც მამისგან ფარულად მოინათლა.
როდესაც დიოსკორემ შვილის გაქრისტიანება გაიგო, იგი მოსაკლავად გაიმეტა და წმინდა ბარბარე ქალაქის მმართველს მიჰგვარა, რომელიც მის წამებას არ დასჯერდა და ბრძანა, ქალიშვილი ქალაქში შიშველი გამოეყვანათ.
ამ დროს სასწაული მოხდა: წმინდა ქალწულის სხეული ზეციურმა ნათელმა შემოსა. ამის დანახვაზე გონებადაბნელებულმა მამამ ერთადერთ შვილს საკუთარი ხელით მოჰკვეთა თავი. დიოსკორე და ქალაქის მმართველი იმავე დღეს დაისაჯნენ. ისინი მეხმა ფერფლად აქცია. წმინდა ბარბარე სიკვდილის წინ უფალს შეევედრა: მისი მოწამებრივი აღსასრულის ყველა მომხსენიებელი უზიარებლად გარდაცვალებისაგან დაეფარა.
დიდმოწამე ბარბარე განსაკუთრებით ბავშვების მფარველად ითვლება.
კომენტარები