Wizz Air 2012 წელს ოპერირების დაწყებიდან დღემდე 5 მილიონ მგზავრს მოემსახურა.
იღბლიანი მგზავრი ქართველი საბა ადამაძეა, რომელიც ზუსტად მეხუთმილიონე აღმოჩნდა, Wizz Air-ით საქართველოში საბერძნეთიდან ჩამოფრინდა და ავიაკომპანიისგან სამოგზაურო ვაუჩერით და სხვა სიმბოლური პრიზებით დასაჩუქრდა.
“ქუთაისის საერთაშორისო აეროპორტში უკვე 5 მილიონ მგზავრს მოვემსახურეთ – ეს მიღწევა ხაზს უსვამს ჩვენს მიმართ ნდობას და უზომოდ მადლიერები ვართ ამ ერთგულებისთვის. ცხადია, ვაგრძელებთ მიმართულებების დამატებას. ჩვენი მიზანია, დავაკავშიროთ ქუთაისი საინტერესო მიმართულებების კიდევ უფრო ფართო სპექტრთან, რომელიც ქართველ მომხმარებლებს უდავოდ მოეწონებათ, სხვადასხვა ევროპის ქვეყნიდან კი მეტ ტურისტს მოიზიდავს საქართველოში”, – აცხადებს Wizz Air-ის კორპორატიული კომუნიკაციების მენეჯერი ჟუჟა ტრუბეკი.
Wizz Air ამჟამად ოპერირებს სამი A321 ტიპის ავიახომალდით, რომელიც ახორციელებს 28 რეისს 16 ქვეყნის მიმართულებით.
“მოხარულები ვართ Wizz Air-თან ერთად აღვნიშნოთ კიდევ ერთი შესანიშნავი მიღწევა. სატრანსპორტო კომპანიის ფრენებზე მგზავრების მზარდი რაოდენობა არ არის მხოლოდ ნათელი სიგნალი იმისა, რომ საჰაერო მიმოსვლა აღდგა პანდემიის შემდეგ, არამედ ის ასევე ხაზს უსვამს ქუთაისის საერთაშორისო აეროპორტის, როგორც რეგიონში განვითარებისა და დამაკავშირებელი საყრდენის როლს. თვიდან თვემდე ვაკვირდებით ჩვენს აეროპორტში მგზავრების რეკორდულ რაოდენობას, რაც კიდევ უფრო ხაზს უსვამს ამ მიღწევის მნიშვნელობას. ჩვენ გულწრფელად ვულოცავთ კომპანიას სწრაფ ზრდასა და ამ მნიშვნელოვან მიღწევას“, – აცხადებს საქართველოს აეროპორტების გაერთიანების აღმასრულებელი დირექტორი ირაკლი ქარქაშაძე.
კომენტარები