ქუთაისის სააპელაციო სასამართლომ ძალაში დატოვა საქალაქო სასამართლოს გადაწყვეტილება, რომლის მიხედვითაც ქუთაისის მერიის განათლების განყოფილების ხელმძღვანელის მაია მურუსიძის გათავისუფლება ბათილად იქნა ცნობილი. 2026 წლის 30 აპრილის განჩინებით, სასამართლომ არ დააკმაყოფილა მუნიციპალიტეტის მერიის სააპელაციო საჩივარი და უწყებას მურუსიძის სამსახურში აღდგენა, ასევე 2022 წლიდან დღემდე იძულებითი განაცდურის და საპროცესო ხარჯების ანაზღაურება დააკისრა.
აღსანიშნავია, რომ ეს მაია მურუსიძისა და ქუთაისის მერიის სამართლებრივი დავის უკვე მეორე შემთხვევაა. იგი პირველად სამსახურიდან 2018 წელს გაათავისუფლეს, თუმცა ხანგრძლივი დავის შემდეგ, 2020 წელს სასამართლოს გზით მოახერხა პოზიციაზე დაბრუნება. მიუხედავად ამისა, 2022 წელს იგი კვლავ გაათავისუფლეს, რაც უფლებადამცველებმა ხელმეორედ გაასაჩივრეს.
ამჯერად სააპელაციო ინსტანციამ სრულად გაიზიარა პირველი ინსტანციის არგუმენტები, რაც ნიშნავს, რომ მერიას სასამართლო გადაწყვეტილების აღსრულება და თანამშრომლისთვის კუთვნილი კომპენსაციის გადახდა მოუწევს. მაია მურუსიძის ინტერესებს სასამართლოში უფლებადამცველი იცავდა.
