“ბერძნული მაფიის” ორი ძლიერი წევრის მკვლელობის საქმესთან დაკავშირებით ორი ქართველი დააკავეს.
ბერძნული მედიის ინფორმაციით, დაკავებულები 29 და 39 წლის პირები არიან.
როგორც მედია წერს, სამართალდამცველებმა დანაშაულში მონაწილე ორი ქართველის გარდა კიდევ სამი პირის იდენტიფიცირება მოახდინეს. ისინი მაფიოზური ჯგუფის წევრები არიან. ერთი მათგანი სასჯელს უკვე იხდის საბერძნეთის ციხეში, ორმა კი ქვეყნიდან გაქცევა მოახერხა, მათზე ძებნა წითელი ცირკულარით არის გამოცხადებული.
პოლიციის ცნობით, დაკავებულები და 3 იდენტიფიცირებული პირი დაქირავებული მკვლელები იყვნენ.
საქმე ეხება იანის სკაფტურუს, ვასილი რუბეტისისა და მისი მარჯვენა ხელის, დიონისე მუზაკიტის მკვლელობას, ასევე მკვლელობის მცდელობას პიეირაში. პირველი მათგანი 2022 წელს აპრილში მოკლეს, საკუთარ აგარაკზე, მკვლელობის მომდევნო ორი შემთხვევა კი 2023 წლის ივნისში მოხდა. რაც შეეხება მკვლელობის მცდელობას, დანაშაული 2023 წლის ივლისით თარიღდება.
კომენტარები