“გვამუშავეს და გადაგვაგდეს” – სამტრედიაში ავტომაგისტრალზე დასაქმებულები კუთვნილ ანაზღაურებს ითხოვენ

ავტომაგისტრალზე დასაქმებულმა მუშებმა სამტრედიაში საპროტესტო აქცია გამართეს.

სამტრედია-გრიგოლეთის მონაკვეთზე დასაქმებულების თქმით, მათ შვიდი თვეა, კუთვნილი ხელფასი არ აუღიათ.

აქციის მონაწილეების განმარტებით, ისინი თვეებია, დამქირავებელ კომპანიას შრომის ანაზღაურებას სთხოვენ, თუმცა უშედეგოდ.

“გვამუშავეს რამდენიმე თვე და ხელფასი რომ მოვითხოვეთ, გვითხრეს, არ გვაქვსო. იმის მერე თვეები გავიდა და თანხა ისევ არ მიგვიღია. ახალი წელი მოდის, ისევე მოვედით, მოვიკითხეთ, ისეც გვითხრეს, რომ მოსაცემი თანხა არ აქვთ. ჩვენ რა დავაშავეთ, ფული თუ არ ჰქონდათ, რატომ დაგვიქირავეს?!” – აცხადებს აქციის ერთ-ერთი მონაწილე.

60-მდე პირი კომპანია “იქს ენერჯი გრუპმა” დაიქირავა, რომლის ხელმძღვანელიც აცხადებს, რომ დასაქმებულებს ანაზღაურებას არ აძლევს, რადგან ქვეკონტრაქტორისგან თანხა მასაც არ მიუღია.