ახლახან ინტერნეტსივრცეში 89 წლის ლამარა ვაშაკიძის ცეკვა გავრცელდა, რომელსაც ძალიან დიდი აჟიოტაჟი მოჰყვა.
სიცოცხლით სავსე, მომხიბვლელი მსახიობი იმდენად არაჩვეულებრივად გამოიყურებოდა, მისი ასაკის გაჟღერებამ ძალიან ბევრის გაოცება გამოიწვია.
ქუთაისის ლადო მესხიშვილის სახელობის დრამატული თეატრის მსახიობი ლამარა ვაშაკიძე დამსახურებული არტისტია, 2014 წელს მესხიშვილის თეატრის წინ, თეატრის მოღვაწეების – ლამარა ვაშაკიძისა და ნათელა საღარაძის ვარსკვლავები გაიხსნა. ლამარა ვაშაკიძეს, რომელიც 19 წლიდან ლადო მესხიშვილის თეატრში მუშაობდა, 100-ზე მეტი როლი აქვს შესრულებული.
“89 წლის გახლავართ, თებერვალში 90 წელი მისრულდება…
65 წელი თეატრში ვმუშაობდი. აკაკი ვასაძე რომ ჩაუდგა სათავეში 1958 წელს, იმის მერე თეატრში ვიყავი… 1956 წელს დავამთავრე – თენგიზ არჩვაძესთან, ჯემალ ღაღანიძესთან, ზინა კვერენჩხილაძესთან და ასეთ საუკეთესოებთან ერთად…
ერთი კურსიდან ექვსი ვარსკვლავი გამოვედით.
თეატრის გარდა მე არაფერი მეკითხებოდა… ერთადერთი შვილი მყავს, რომელიც ახლა 65 წლისაა და მართლაც არაჩვეულებრივი, განსაკუთრეული შვილია! ასეთები ათასში ერთი გამოდიან… მის გაზრდასა და აღზრდაში დედა, დეიდა და ჩემი და მეხმარებოდნენ. მათი გაზრდილია. მე ფიზიკური ჯაფა არ დამდგომია. მოვიდოდი სახლში, დავისვენებდი და მხოლოდ თეატრი იყო ჩემი ცხოვრება. კინოზე უარი ვთქვი, რადგან თვეობით გადაღებებზე წასვლა არ შემეძლო.
გურმანი გახლავართ, მაგრამ ბევრის მირთმევა არასოდეს მიყვარდა… ამოჩემებული მაქვს ყავა, თუ სადმე მივდივარ, ავაქაფქაფებ და დავლევ. ღამის ორ საათზეც დამილევია ჩაი, რძე, ხაჭო, რამე მსუბუქი… ახლა მომატებული ვარ და ვიდეოში ჩემი თავი არ მომეწონა, აუცილებლად უნდა დავიკლო! ადრე სატელევიზიო კადრებში უფრო თხელი ვარ… ჯერ კიდევ ბავშვობიდან ვფიქრობდი, რომ ასაკში არ მქონოდა ნაოჭები და დაბერებული ვყოფილიყავი. ერთი ნაოჭიც არ მაქვს, თმებსაც თვითონ ვიღებავ. ბავშვობიდან თავად ვაკეთებ ყველაფერს, არანაირი ბოტოქსები და ჩარევები. თუმცა სხვებზე მომწონს, მოვლილები და კარგად რომ არიან”, – აცხადებს მსახიობი ambebi.ge-სთან.
კომენტარები