იმერეთის საინფორმაციო სააგენტო infoimereti.ge გთავაზობთ რუბრიკას “ჟურნალისტი სხვა რაკურსით”, რომლის მორიგი სტუმარიც ტელეკომპანია “მეგა ტვ”-ს ჟურნალისტი, თამუნა გვილავაა.
სახელი: თამუნა.
გვარი: გვილავა.
სამუშაო ადგილი: ტელეკომპანია “მეგა ტვ”.
რომ არ ვყოფილიყავი ჟურნალისტი, ვიქნებოდი… იურისტი. გამომძიებელი, თუმცა ჩემი ახლობლები ამბობენ, რომ პაროდისტსაც არამიშავს.
ყველზე მეტად ჩემს პროფესიაში მომწონს… ტემპი, სიმართლის გამოაშკარავების მომენტი და მისი აფიშირება.
როცა ამ პროფესიას ვირჩევდი მეგონა, რომ… ადვილი იყო, თუმცა დრომ და საქმემ აჩვენა, რომ რთულია. მუდამ მზად უნდა იყო. დარში, ავდარში, დღისით და ღამით. ხომ არის კარგი, დილით რომ ვდგებით და ინფორმაციებს ვეცნობით, იმ ინფორმაციების უკან, ჟურნალისტების შრომაა.
ყველაზე დასამახსოვრებელი რეპორტაჟი… ეს რაჭას და აბსნაძის გაქცევას უკავშირდება. ნაქერალას უღელტეხილი უამინდობაში, ახალბედზე გადავიარეთ, ღამე ქუჩაში გავათენეთ და დილით აბსნაძის კვალს, ქუსლიანი ფეხსაცმელებით გავყევით მე და რეზო ბუხსიანიძე. (გადაღებაზე იმ მომენტში წავედით, სტუმრად რომ ვიყავი და ფეხზე სპორტული ფეხსაცმელი არ მეცვა) მივრბივართ ამ აღმართ-დაღმართებში და თან ვტირი. რეზო გულს მიკეთებდა ვითომ და შემეკითხა, აბსნაძე გეცოდება ხოო?! ბოლოს, ფეხშიშველმა დავასრულეთ მასალის მომზადება.
ყველაზე მეტად ადამიანში ვაფასებ… სიკეთეს, იუმორს და განათლებას.
მჯერა, რომ… ოდესმე მექნება პატარა სახლი ზღვაზე.
ის, რაც ყველაზე მეტად მომწონს ჩემს თავში… ბოროტი რომ არ ვარ, აი ეს.
რაც ყველაზე მეტად არ მომწონს საკუთარ თავში… ვარ ე. წ. ფეთიანი დედა, ბებია, და, დეიდა, მეუღლე, მამიდა და ასე შემდეგ. ვხდები კურდღელივით მშიშარა, თუ საქმე ჩემი საყვარელი ადამიანების ჯანმრთელობას ეხება.
ის, რის გარეშეც ვერ წარმომიდგენია ცხოვრება, არის... ყავა, სუნამო, სიგარეტი, გლობალურად თუ გამოვარჩევ, მზე.
ბავშვობაში ყველაზე მეტად მინდოდა, რომ… რომანი დამეწერა.
ამ წამს ყველაზე მეტად მინდა, რომ ვიყო… ბევრფულიანი, უამრავ კარგ საქმეს გავუკეთებდი ახლობლებსაც და სხვებსაც.
ნიჭი, რომელსაც მინდა ვფლობდე… ეს არის სიმღერის ნიჭი. ჩემი და მუსიკის ურთიერთობა სოლფეჯიოს გამოცდის შემდეგ დასრულდა, როცა მამაჩემს, მისმა კლასელმა, ცნობილმა პედაგოგმა უთხრა: ნურც ამას აწვალებ და ნურც მეო.
ამოჩემებული სამოსი… კი მაქვს, განწყობის მიხედვით.
ყველაზე ხშირად მავიწყდება… დიდი რომ ვარ და პატარა ასაკი აღარ მაქვს..
ფრაზა, რომელსაც ყველაზე ხშირად ვიყენებ საუბარში, არის … ვერ დავწერ. მძღოლი ვარ და თავად წარმოიდგინეთ.
ადრე ვფიქრობდი, რომ…წონას ყოველთვის დავაგდებდი.
ახლა ვფიქრობ, რომ… რაც ღმერთს არ უნდა, ის არ მოხდება.
თავისუფალ დროს… მიყვარს ფილმების ყურება. ნუ, დეტექტივების, რა თქმა უნდა.
მეშინია…უდედაჩემობის. როგორ უნდა ვიცხოვრო აწი, როცა ვიცი, რომ დედაჩემს ვეღარ ჩავეხუტები.
ვტირი მაშინ, როდესაც...უმწეო ვარ.
მრცხვენია მაშინ, როდესაც… მივხვდები, რომ მართალი არ ვიყავი.
ყველაზე მეტად მიყვარს… ჩემი შვილები, შვილიშვილი, ოჯახი და ზღვა.
არასოდეს გავაკეთებ… ბოროტებას.
რისი თქმაც ყოველთვის მინდოდა და ახლა ვამბობ…არავინ იცის, რა იქნება ხვალ. იცხოვრეთ დღეს.
სიყვარული არის… ბედნიერებაც და ტკივილიც. ვერტიკალური და ბრუნვადი, ატრიალებს დედამიწას და ტოვებს ნაწიბურებს გულზე.
ყველაზე ბედნიერი ვიყავი მაშინ… როდესაც ჩემმა შვილმა ნიკამ, პირველად მითხრა მიყვარხარო.
როდესაც ცუდად ვარ…ვიღრინები. საკუთარ თავს ვაჯერებ, რომ ძლიერი ვარ და ესეც გაივლის.
დღეს დილით პირველი, რაც გავიფიქრე იყო… დედა მემომენატრე.
ყველაზე დიდი სისულელე, რაც გამიკეთებია, არის… ბევრი რამ.
პირად ურთიერთობებში ვარ… ყურადღებიანი, მზრუნველი.
მინდა დამიმახსოვრონ, როგორც… რა იყო ვკვდები? მხიარული, სასიამოვნო, საყვარელი ადამიანი.
კომენტარები